Bakıda “Dual təhsil/ iş yerində öyrənmə” proqramına start verilib

Bakıda dual təhsil sistemi tətbiq olunur. Bu haqda 16 may tarixində Bakuplus.az Bakı Peşə Təhsili üzrə Dövlət Agentliyinə istinadən xəbər verir.

Avropa İttifaqı, BMT-nin İnkişaf Proqramı və Peşə Təhsili üzrə Dövlət Agentliyinin birgə təşəbbüsü ilə peşə təhsili məzmununun əmək bazarının tələblərinə daha səhih və davamlı qaydada uzlaşdırılmasına dəstək məqsədilə “Dual təhsil/ iş yerində öyrənmə” proqramına start verilib.

Hazırda layihənin dəstəyi ilə turizm, mebel, tekstil və xidmət sahələri üzrə Şəki, Lənkəran, Cəlilabad və Bakı şəhərlərində aparıcı işəgötürən müəssisələr ilə əməkdaşlıqlar qurulub və ilk fəaliyyətlərə başlanılıb.

Mədəniyyət və Sənətkarlıq üzrə Bakı Dövlət Peşə Təhsil Mərkəzinin tələbələri “aşpaz” ixtisası üzrə “Saffron” Restoranlar qrupunun “Amburan” istirahət mərkəzində, “ərzaq və qeyri ərzaq mallarının satıcısı, nəzarətçi-xəzinədar” ixtisası üzrə “ARAZ” supermarketləri şəbəkəsində, eyni mərkəzin “tikiş operatoru, tikişçi” ixtisası üzrə təhsil alan tələbələri isə “Barama Tekstil” MMC şirkətində dual proqrama qoşulublar.

Dual təhsil proqramının ənənəvi peşə təhsilindən fərqi:

• Tələbələr əldə etdikləri nəzəri biliklərin paralel olaraq təhsil ili boyunca sahələrinə uyğun müəssisələrdə real iş şəraitində praktiki qaydada tətbiq edə və öyrənə bilirlər;


• Proqram müddətində tələbələr həmin müəssisələrin xüsusi geyimləri, nəqliyyat, sığorta və qida ilə təmin edilirlər.