Bakıda “Maqnetik Bağçadan Mahnılar və Görüntülər” adlı təlim keçiriləcək. Bu haqda BakuPlus.az bu gün, 25 aprel tarixində xəbər verir.
6 gün ərzində Salaam Cinema-da baş tutacaq eksperimental elektronik musiqi təlimi istər analoq, istərsə də rəqəmsal mediumda çalışan istənilən səviyyə səs ustaları və həvəskarları üçün açıqdır.
Musiqiçi və müəllif Skott MakKollok Salaam-ın musiqi studiyasında və Bakının müxtəlif yerlərində birgə sessiyalar təşkil edəcək, tarixi və nəzəri təlimlər, sahə səsyazması, dərin dinləmə, kollektiv improvizasiyalar və eksperimentlər, elektroakustik mediumlar, musique concrète, səs kollajı və kasset lenti montajı kimi müxtəlif praktiki texnikalar haqqında müzakirə aparacaq.
Şənbə günü baş tutacaq performansda iştirakçılar təlim ərzində öyrəndikləri texnikaların köməyi ilə ərsəyə gətirdikləri işlərini nümayiş etdirəcəklər.
2-7 May tarixlərində baş tutacaq dərslərə hər kəs qoşula bilər. İştirak etmək üçün qeydiyyatdan keçmək zəruridir.
Müraciət üçün son tarix 30 apreldir.
