Bakıda "UrbanSpace” adlı təlim və təcrübə proqramı keçiriləcək. Bu haqda BakuPlus.az bu gün, 20 aprel tarixində xəbər verir.
USAID/Azerbaijan və Black Sea Trust for Regional Cooperation-ın maliyyə dəstəyi ilə 4 gün müddətində keçiriləcək təlimlərdə məqsəd memarlıq, inşaat mühəndisliyi, şəhərsalma, dizayn və əlaqəli ixtisaslarda təhsil alan və ya təhsilini bitirmiş bir qrup gəncə müasir şəhərsalmanın əsasları və urbanistika ilə bağlı bilik və fərqindəliklərini artırmaqdır.
Seçilən iştirakçılarla “Müasir şəhərsalma və onun əsas komponentləri”, “Ağıllı şəhər, insan və müxtəliflik”, "Şəhərlərdə nəqliyyat sistemini necə effektiv şəkildə təşkil etməli?" mövzuları ilə bağlı təlimlər keçiriləcək.
Sonda təlimlərdə qazanılan bilik və bacarıqların möhkəmləndirilməsi məqsədilə təcrübə keçiriləcək.
2, 3, 4 və 9 may tarixlərində təşkil olunacaq layihədə iştirak etmək üçün Bakı ərazisində yaşayan 18-25 yaş aralığında inşaat mühəndisliyi, memarlıq, şəhərsalma, dizayn və əlaqəli ixtisaslar üzrə təhsil alan tələbələr, məzunlar və digər gənclər müraciət edə bilər.
Azərbaycan dilində keçiriləcək təlimlərin sonunda iştirakçılar sertifikatla təltif ediləcək.
İştirak etmək üçün qeydiyyatdan keçmək mütləqdir. Müraciət üçün son tarix: 28 apreldir.
