Bakıda 28 Mall ticarət mərkəzində gender mövzusunda həyata keçirilən “Ürəyinin Səsini Dinlə” layihəsinin açılış sərgisi 22 aprel tarixində keçirilib. Bu haqda Real TV reportaj hazırlayıb.
Birləşmiş Millətlər Təşkilatının (BMT) Əhali Fondunun təşkil etdiyi layihənin əsas məqsədi gender əsaslı cins seçimi, qız uşaqlarının dəyərinin təşviqi, selektiv abortlarla mübarizə mövzuları üzrə ictimai məlumatlılığı artırmaqdır.
Sərginin açılış mərasimində Avropa İttifaqının Azərbaycandakı Nümayəndəliyinin rəhbəri səfir Peter Mixalko, BMT-nin Əhali Fondunun Azərbaycan nümayəndəliyinin rəhbəri Fərid Babayev, gənclər və idman nazirinin müavini Fərhad Hacıyev, Ailə, Qadın və Uşaq Problemləri üzrə Dövlət komitəsinin sədr müavini Sədaqət Qəhrəmanova və Əmək və Əhalinin Sosial Müdafiəsi Nazirliyinin aparat rəhbəri Fuad Musayev çıxış ediblər.
Çıxış edənlər Azərbaycanda doğulan uşaqlar arasında cins nisbətinin pozulmasının böyük problem olduğunu, gender bərabərliyi mövzusundakı problemlərin həlli üçün maarifləndirmə işinin aparılmasının vacib olduğunu bildiriblər.
Qadın sahibkarlığının inkişafı, işgüzar fəaliyyətdə qadınların dəstəklənməsi kimi işlər haqqında danışan səfir Avropa İttifaqının bu sahədə ölkəmizdə gördüyü işlər haqqında məlumat verib. Sonda sərgilənən 20-dək rəsm əsəri arasından ilk 3 yeri tutan iştirakçılar təltif olunub.
Masallı və Gəncə şəhərlərində də təşkil olunacaq sərgi 3 gün davam edəcək.
[URIS id=41764]
