Bakıda küçə ifaçıları sahəsi getdikcə populyarlaşır. Ölkəyə yerli müğənnilər, musiqiçilər, rəssamlarla yanaşı, xarici aktyorlar da gəlməyə başlayıb. Belə ki, aprelin əvvəlində Türkiyənin pantomim aktyoru Ferhat Kılıçın Bakıya gəldiyi məlum olub.
27 yaşlı aktyor 13 ildir pantomima sənəti ilə məşğul olur. Bu müddət ərzində o, öz proqramı ilə artıq 26 ölkəyə səyahət edib.
2019-cu ildə Bakı Turizm İnformasiya Mərkəzi küçə sənətini daha da aktuallaşdırmaq, vahid idarəetməni təşkil etmək, ixtisaslı və istedadlı insanları cəlb etmək üçün “Küçə sənətçiləri” layihəsini hazırlayıb.
Layihənin şərtlərinə görə, seçim mərhələsindən uğurla keçmiş istedadlı şəxslər müqavilə bağlayaraq icəzə vərəqəsi əldə edir. Buna əsasən, rəssamlar 3 ay ərzində xüsusi ayrılmış yerlərdə öz bacarıqlarını nümayiş etdirə bilərlər. 3 aydan sonra müddətin uzadılması üçün sənətçilər yenidən Mərkəzə müraciət edə bilirlər. Küçə ifaçısı kimi çıxış etmək üçün heç bir rüsum ödəmək tələb olunmur.
Hazırda Nizami, Nigar Rəfibəyli, Məmməd Əmin Rəsulzadə, Xəqani küçələrində və Xəqani parkında küçə rəssamları üçün xüsusi yerlər var.
Layihədə yerli sakinlərlə yanaşı, xarici rəssamlar da iştirak edir. Proqram çərçivəsində məşhur qəhrəmanları yamsılayan aktyorlar və canlı heykəllər üçün xüsusi geyimlər və avadanlıqlar hazırlanıb.
Bildirilir ki, Bakıda xüsusi yerlərdə küçə sənətçisi kimi çıxış etmək istəyənlər Bakı Turizm İnformasiya Mərkəzinə müraciət edə bilərlər.
[video width="288" height="640" mp4="https://bakuplus.az/storage/photos/2022/04/whatsapp-video-2022-04-21-at-17.213.09.mp4"][/video]
