Paytaxtda bazarda toyuqların ucuz qiymətə satılmasının səbəbi açıqlanıb. Bu haqda 20 aprel tarixində Xəzərxəbər məlumat verib.
Bakıda çəkisi 1 kq-dan artıq olan toyuqlar 3 ədədi 11 manata satılır. Söhbət bazar girişində, avtomobillərin yük yerində satılan toyuq məhsullarından gedir. Səhər saatlarından, bəzən hətta axşam saatlarından sözügedən avtomobillər gəlib bazarda öz yerini alır. Bu toyuqların ən ucuzu marketlərdə 5 manatdan başlayan qiymətlərlə satılsa da, burada mənzərə fəqrlidir.
Bu toyuqların satışı ilə məşqul olan şəxslər deyir ki, toyuqların ucuz olmasının səbəbi keyfiyyətində deyil. Onlar bildirirlər ki, bu toyuqlar yumurtadan kəsilən toyuqlardır. Heç bir saxlama şəraitinə riayət olunmasa da, bu toyuqların alıcıları da kifayət qədərdir.
“İstehlakçılar özləri də qida məhsulları, xüsusilə də quşçuluq məhsulları, toyuq, toyuq məhsulları alarkən bir sıra zəruri məsələlərə diqqət etməlidirlər. Toyuq və toyuq məhsullarının daşınması, saxlanılması, satışı zamanı sanitar norma qaydalara ciddi riayət olunmalıdır. Alıcılar bu məhsulların keyfiyyəti və təhlükəsizliyinə tam əmin olmaq üçün satıcıdan məhsulun baytar müayinəsindən keçdiyini və mənşəyini təsdiq edən sənədləri tələb edə bilərlər”, - deyə Qida Təhlükəsizlik Agentliyi məsələ ilə bağlı vətəndaşları xəbərdar edib.
