Yeni dərs ilinin başlaması ilə əlaqədar Bakıda məktəbli yarmarkaları təşkil olunacaq. Bu haqda bu gün, 19 avqust tarixində Bizim.Media məlumat verib.
Bakı Şəhər İcra Hakimiyyəti Ticarət və Xidmət Departamentindən bildirilib ki, bu il də ənənəvi olaraq yarmarkalar fəaliyyət göstərəcək.
Artıq insanların çox olduğu yerlərdə, xüsusilə metro çıxışlarında yarmarkaların qurulmasına başlanılıb. Həftənin sonuna qədər bütün hazırlıq işləri tamamlanacaq.
Yarmarkalar bir ay ərzində davam edəcək. Əsas məqsəd yeni dərs ili ərəfəsində orta məktəb şagirdlərinin məktəb ləvazimatlarına olan tələbatını daha sadə, rahat və çevik şəkildə ödəməkdir.
Yarmarkalar üçün qurulan çadırlarda bütün məktəb ləvazimatları - kitab, dəftər, qələm, karandaş, çanta və digər mallar satılacaq. Yarmarkalar vahid mərkəzdən idarə olunacaq, qiymətlərə və xidmətlərə Bakı Şəhər İcra Hakimiyyəti nəzarət edəcək.
