Suraxanı rayonu Yeni Günəşli qəsəbəsi ərazisində yerləşən 17 mərtəbəli binanın sakinləri mənzillərinə sənədlər ala bilmirlər. Sakinlərin sözlərinə görə, mənzil-tikinti kooperativinin təsisçisi onlara mənzillərin eskizlərini verməkdən imtina edib. Sakinlərin sözlərinə görə, onlardan bu sənəd üçün pul tələb olunur. Bu haqda bu gün, Xəzər Xəbər reportaj hazırlayıb.
Həmin bina 2008-ci ildə ''Ayla'' mənzil tikinti koperativi tərəfindən inşa edilmişdir. Lakin, 2019-cu ildə MTK-nın təsisçisi Əli Abışov evi qeydiyyatdan keçirərkən evdəki 240 mənzildən 28-nə dair çıxarış almaq üçün layihə təqdim etməyib.
Sakinlər iddia edir ki, o, həmin sənədi onlara verməmək üçün sakinlərin adına olan müqaviləyə də xitam verib.
“Ayla” MTK-nın hüquqşünası Gülbala Zamanov isə sakinlərin iddiaları ilə razılaşmayıb. O qeyd edib ki, Əli Abışov 2013-cü ildə həbs olunan zaman Mənzil Tikinti Kooperativinin sədri İsmayıl Paşayev digər mülkiyyətçilərlə birlikdə bu vətəndaşlara qanunsuz olaraq mənzil satıb. Gülbala Zamanov bildirib ki, sakinlərin MTK rəhbərliyinin çıxarış üçün pul tələb etməsi ilə bağlı dedikləri əsassızdır.
Tikinti şirkətinin keçmiş sədri İsmayıl Paşayev bildirb ki, o, mənzilləri təsisçi Əli Abışov həbsdə olarkən onun istəyi ilə satmışdır.
MSK-nın təsisçisi bu məsələ ilə bağlı Korrupsiyaya Qarşı Mübarizə Baş İdarəsinə də müraciət edib və iş orada araşdırılır.
