Bakıda “FACEMARK” MMC-nin təşkilatçılığı ilə “Milli Marketinq Forumu” keçiriləcək. Bu haqda BakuPlus.az Report-a istinadən bu gün, 6 may tarixində xəbər verir.
Bu, 2013-cü ildən etibarən təşkil edilən və ölkəmizin marketinq sahəsində ilk forumdur.
İki gün davam edəcək forum 10-11 iyun 2022-ci il tarixlərində “Baku Marriott Hotel Boulevard”-da baş tutacaq.
Tədbirin əsas təşkilatçısı “Facemark” MMC-nin həmtəsisçisi Rafiq Hunaltay tədbirin məqsədi, konsepti və bu ilki yenilikləri barədə fikirlərini belə ifadə edir:
“Reallığa daha yaxın olmaq üçün "ÖZ YOLUMUZ" olmalıdır. Bu il VIII “Milli Marketinq Forumu” məhz öz yolumuza işıq tutacaq. Ölkəmizdə fəaliyyət göstərən yerli və xarici şirkətlərin qarşılaşdığı 11 ən mühüm problemə qarşı öz çıxış yolumuzu bu il 8 paneldə işıqlandıracağıq. İlk dəfə bu il həm spikerlərin fərdi təqdimatlarından ibarət panellər, həm də “Davos”formatı müzakirələrinin baş tutacağı panellər olacaq”.
