Bakıda Türkiyənin Milli Suverenlik və Uşaq Bayramı Günü, həmçinin Türkiyə Böyük Millət Məclisinin (TBMM) fəaliyyətə başlamasının 102-ci ildönümü qeyd olunub. Bu haqda Azərtac-a istinadən bu gün, 23 aprel tarixində xəbər verir.
Heydər Əliyev sarayında təşkil olunan tədbirdə qardaş ölkənin Azərbaycandakı səfiri Cahit Bağçı, diplomatik nümayəndəliyin əməkdaşları, eləcə də Bakıdakı türk məktəbinin azərbaycanlı və türkiyəli şagirdləri iştirak ediblər.
Azərbaycan Respublikası təhsil nazirinin müavini Muxtar Məmmədov və səfir Cahit Bağçının çıxışlarından sonra tədbir bədii hissə ilə davam etdirilib.
Bakıdakı türk məktəbinin şagirdləri bu əlamətdar günə həsr olunan şeirlər söyləyib, mahnılar oxuyub, rəqslər ediblər.
Bütün dünyanın sevimli uşaqları hər il Türkiyədə toplaşaraq, 23 aprel Uşaq Bayramını təntənə ilə qeyd edirlər.
