Bakıda yataqxanalardakı mənzillərin ucuz qiymətə satılmasının səbəbi açıqlanıb. Bu haqda 25 mart tarixində İtv məlumat verib.
Paytaxtda bir çox yataqxanalarda mənzil adı ilə otaqların alqı-satqısı həyata keçirilir. Bunlar əsasən sovet dövründə mövcud olmuş zavod və fabriklərin yataqxanalarıdır. Elan saytlarında 1 və 2 otaqlı yataqxanalar 10.000-dən 25.000 manatadək satılır.
Daşınmaz Əmlakın Dövlət Reyestri xidmətindən bildirilib ki, bu cür mənzilləri özəlləşdirərkən qanunla dövlət mülkiyyətində olan yataqxanalar müvafiq icra hakimiyyətini orqanının balansına verilir. Həmin yataqxanalardakı mənzillər yalnız orada faktiki yaşayan mənzil fondunun mülkiyyətçisi ilə mənzil kirayə müqaviləsi olan sakinlər tərəfindən özəlləşdirilir.
Təhsil müəssisələrinin yataqxanalarındakı otaqların özəlləşdirilməsi isə qanunla qadağandır. Buna baxmayaraq, bu cür otaqların satışı həyata keçirilir. Özəlləşdirilmədən satışa çıxarılmış yataqxana tipli mənzillərin qiyməti ucuz olsa da, ona tələbat azdı.
Ekspertlər hesab edir ki, bu cür binaların əksəriyyətinin istismar müddəti başa çatdığından onu almaq riskli sayıla bilər.
