Bakıda məktəblilər arasında “Mənim gündəliyim” oxu və yaradıcılıq müsabiqəsi keçirilir. Bu haqda BakuPlus.az Azərtac-a istinadən bu gün, 9 aprel tarixində xəbər verir.
Bakı Şəhəri üzrə Təhsil İdarəsinin təşkil etdiyi və iki mərhələdən (məktəb və şəhər) ibarət olan müsabiqədə Bakı şəhər ümumtəhsil müəssisələrinin aşağı yaş qrupları (1-7-ci siniflər) və yuxarı yaş qrupları (8–11-ci siniflər) üzrə şagirdləri iştirak edəcəklər.
Birinci mərhələdə şagirdlər Azərbaycan və dünya ədəbiyyatından əsərləri oxuyaraq gündəlik hazırlayacaqlar.
Şəhər mərhələsində isə şagirdlərin təqdim etdikləri gündəliklərə münsiflər heyəti qiymət verərək ən yaxşı işləri seçəcək.
Müsabiqənin nəticələrinə əsasən hər biri 5 nəfər olmaqla ilk 3 yerin sahibləri qalib adını qazanacaq. Xüsusi fəallığı ilə fərqlənən 10 şagirdə tərifnamə, fəal iştiraka görə 25 şagirdə isə təşəkkürnamə təqdim ediləcək.
Qaliblər BŞTİ tərəfindən diplom və hədiyyələrlə mükafatlandırılacaq.
