Azərbaycanlı İstanbulda qaydaları pozub, lakin cərimə Türkiyə vətəndaşı olan qadın traktor sürücüsünə kəsilib. Bu haqda 30 mart tarixində Qafqazinfo.az məlumat verib.
Türkiyənin İsparta şəhərinin Gökçehüyük kəndində yaşayan 64 yaşlı Emine Tüzün adlı qadın maraqlı bir hadisə ilə üzləşib. İddia edilib ki, o, öz 10-EE-111 nömrəli traktoru ilə İstanbulda 6 dəfə körpülərdən, 3 dəfə də avtomobil yolundan ödəniş etmədən keçib. Buna görə qadına 476 lirə (56 AZN) cərimə yazılıb.
Türkiyənin Nəqliyyat və İnfrastruktur Nazirliyi məsələ ilə bağlı araşdırma aparıb. Məlum olub ki, qadın İstanbuldan 650 kilometr uzaq məsafədə yaşayır. Qaydaları isə 10-EE-111 dövlət nömrə nişanlı “Range Rover” markalı avtomobilin sahibi, Binəqədi rayon sakini Eldəniz Həsənov pozub. Həm avtomobilin, həm də traktorun nömrə nişanı eyni olduğundan, cərimə səhvən Emine Tüzünə kəsilib. Məsələ aydınlaşdırıldıqdan sonra qadına kəsilən cərimə ləğv olunub.
“Bu, Türkiyə polisinin səhvi deyil. Çox güman ki, şəhər kameralarının səhvidir. Yəqin ki, mən qaydanı pozanda kamera avtomatik olaraq mənim nömrəmi çəkib eyni nömrəli Türkiyə nömrəsinə göndərib. Bir sözlə, kameranın problemidir”, - deyə avtomobilin sahibi Eldəniz Həsənov bildirib.
