Binəqədi rayonunda yaşayış evində su borusunun partlaması nəticəsində ev yararsız vəziyyətə düşüb. Bu haqda 17 avqust tarixində Bakuplus.az ARB-yə istinadən xəbər verir.
Mədən 1, korpus 30, mənzil 170 ünvanında evin altında yerləşən su borusunun partlaması nəticəsində buranı su basıb və mənzil yaşamaq üçün yararsız olub. Təxminən 2 həftəyə yaxındır ki, sakinlər belə bir şəraitdə yaşamaq məcburiyyətində qalıblar. Suyun dərinliyi isə təxminən 2 metrə gəlib çatır, həmçinin borunun partlaması nəticəsində su qonşuluqda yerləşən evlərə də dolub.
“Artıq ev bərbad haldadır, divarlar çatlayıb. “Azərsu”ya müraciətlər heç bir nəticə vermir. Deyirlər ki, ərizə yaz, ver, kəndə su kəməri yenidən çəkilsin. Su kəməri də 1 ay müddətində yenidən çəkiləcək ya çəkilməyəcək”, - ev sahibi Elşən Ələkbərov bildirib.
Sakinlər xüsusi havalandırma sistemlərini açmaqla mənzillərinə dolmuş suyu xaric etməyə çalışırlar. Suyun qonşu evlərə keçməməsi və məhəllə boyunca axmaması üçün sakinlər süni maneələr yaradaraq onun qarşısını almağa çalışırlar.
Problemlə bağlı Binəqədi qəsəbə bələdiyyəsi bildirdi ki, məsələ onların səlahiyyətlərinə daxil deyil.
“Sözügedən ev magistral su kəmərinin üzərində qanunsuz tikilib. Qurumun qəza briqadası ərazidə su axıntısının qarşısını almaq üçün lazımi tədbirlər görür”, - “Azərsu” ASC açıqlama verib.
[caption id="attachment_59380" align="alignnone" width="800"]
Foto ARB24-ün rəsmi Youtube kanalı[/caption]
