Qanunsuz taksi sürücüləri paytaxtın küçəsini bağladılar. Bu haqda 15 aprel tarixində Bizim.Media xəbər verib.
Binəqədi rayonu, 2-ci mədən küçəsini qanunsuz taksi fəaliyyəti ilə məşğul olan sürücülər zəbt edib. Dar və ikitərəfli yolun kənarında sıra ilə parklanan avtomobillər ərazidə süni sıxlıq yaradıb. Sakinlərin dediklərinə görə, hər gün yaşanan bu mənzərə həmin yoldan müntəzəm istifadə edənləri təngə gətirib. Magistral yolda istər avtomobillərin, istərsə də piyadaların hərəkəti mümkünsüz hala gəlib. Sürücülər isə sıxlığa səbəb kimi küçənin dar olduğunu qeyd ediblər.
Avtomobil yollarının hərəkət hissəsində sədlərin, şlaqbaumların qurulması və ya nəqliyyat vasitələrinin hərəkətinin başqa üsullarla kəsilməsinə, eləcə də avtomobillərin və piyadaların hərəkətinə süni maneələrin yaradılması inzibati məsuliyyət yaradır.
Belə olan halda fiziki şəxslər 80 manatdan 100 manata qədər, vəzifəli şəxslər 400 manatdan 500 manata qədər, hüquqi şəxslər isə 3000 manatdan 4000 manata qədər cərimə oluna bilərlər.
