Paytaxtın Binəqədi rayonu, Ağasadıq Gəraybəyli küçəsində yerləşən 4 saylı fəhlə yataqxanasının beton tavanı çöküb. Bu haqda bu gün, 1 fevral tarixində Bakuplus.az Xəzər Xəbər-ə istinadən məlumat verir.
1964-cü ildə inşa olunmuş binada 100-dən çox sakin yaşayır. 2-ci mərtəbədə yerləşən ümumi hamamdan 20 mənzilin sakinləri istifadə edirlər. Ötən gün səhər saatlarında həmin hamamın tavanı çöküb. Xoşbəxtlikdən həmin vaxt hamamda heç kim olmayıb. Sakinlər bildirirlər ki, yataqxanada belə hal ilk dəfə deyil.
Məsələ ilə bağlı Binəqədi Rayon İcra Hakimiyətindən bildirildi ki, bina xüsusi təyinatlıdır, Bakı şəhəri Mənzil Kommunal Təsərrüfatı Departamentinin balansındadır. Departamentdən isə bildirildi ki, binaya baxış keçirilib, təhlükəsizlik tədbirləri görülüb, birinci və ikinci mərtəbələrdəki sanitar qovşaqlarda qapılar bağlanıb.
Fövqəladə Hallar Nazirliyindən (FHN) bildirildi ki, məsələ ilə bağlı nazirlik tərəfindən araşdırma aparılır, nəticələr haqqında məlumat veriləcək.
