Paytaxt sakinlərinin çoxu məzarların hansı qiymətə satıldığını yerindən asılı olaraq bilir. Rəsmilər məzarların satıldığını etiraf etməsələr də, mərhumu dəfn etmək istəyən hər kəs qəbiristanlıqda açıq satışla üzləşməli olub. Ümumiyyətlə, son illər Bakıda “qəbiristanlıq bazarı” formalaşıb və artıq şəhər əhalisinin əksəriyyəti ayrı-ayrı qəbiristanlıqlardakı qəbirlərin qiymətini bilir. Bu haqda bu gün, 12 aprel tarixində ATV Xəbər reportaj hazırlayıb.
Reportajın çəkilişi zamanı jurnalistlər Masazır, Hövsan və Bibi-Heybət qəsəbələrindəki qəbiristanlıqları ziyarət ediblər. Qəbiristanlıq işçiləri kamera qarşısında danışmaqdan imtina etsələr də, telefonla bir qəbir üçün torpağın təxmini qiymətini açıq şəkildə səsləndiriblər.
Şəhər sakinlərinin dediyinə görə, hazırda qəbiristanlığın yerindən asılı olaraq qiymətlər 150-3000 manat arasında dəyişir.
Məsələ ilə bağlı Masazır bələdiyyəsinə müraciət etsələr də, jurnalistlər suala konkret cavab tapa bilməyiblər. Bələdiyyənin vergi şöbəsinin müdiri Ceyhun İsmayılov qəbiristanlığa nəzarət etdiklərini bildirib: “Hər bir bələdiyyənin öz ərazisində olan qəbiristanlığın nəzarətini bələdiyyə aparır. Amma digər məsələ ilə bağlı, mənim sahəm olmadığına görə, sizə yanlış və ya doğru cavab verə bilmirəm”.
Şəxsiyyəti müəyyən olunmayan cəsədlər və ya şəhər qəbiristanlığında torpaq sahəsi üçün pul ödəyə bilməyən aztəminatlı ailələrinin qohumları kimsəsizlər qəbiristanlığında basdırılır. Burada dəfn olunanlar barədə heç bir məlumat yoxdur, onların məzarının üstündə yalnız dəfn nömrəsi quraşdırılır.
