Yasamal Yaşayış Kompleksində Güzəştli Mənzillərin Mənzil İnşaatı Dövlət Agentliyi tərəfindən satılması ciddi narazılıq yaradıb. Buna səbəb bir neçə saniyə ərzində 442 mənzilin satılmasıdır. Bu haqda bu gün, 13 aprel tarixində APA məlumat verir.
Bildirilir ki, bu qədər qısa müddətdə sərfəli mənzil satışı yalnız “xüsusi proqram təminatı” vasitəsilə mümkündür. Həmçinin mütəxəssislər qeyd edir ki, mənzillər 5-6 saniyəyə seçilirsə, bu insanlar hər hansı bir “proqram”dan istifadə ediblər. İddia olunur ki, uVision və Mousereader kimi proqramlardan istifadə olunub və bunun üçün xüsusi şəxslər işə götürülüb.
Bu ifadələrə əsaslanaraq araşdırma başlayıb. Məlumata görə, artıq mənzil alanlar arasında xüsusi proqramlardan istifadə edən şəxslər müəyyən edilib. Hazırda onlar Baş Mütəşəkkil Cinayətkarlıqla Mübarizə İdarəsinə çağırılaraq dindirilir.
İlkin istintaqa görə, mənzil almaq istəyən vətəndaşlar “proqramçılar”a təxminən 10-15 min manat və daha çox pul ödəyib, onların da çoxu aldadılıb. İndi həmin vətəndaşlar zərərçəkmiş kimi hüquq-mühafizə orqanlarına müraciət ediblər.
Hazırda araşdırmalar davam etdirilir. MİDA-nın nümayəndələri isə həmin ittihamları rədd edərək bildirir ki, evlərin satışı 13 dəqiqədən çox çəkib.
