Bakının Suraxanı rayonunda 132 yaşlı bina qəzalı vəziyyətdədir. Bu haqda BakuPlus.az Real Tv-yə istinadən bu gün, 29 aprel tarixində xəbər verir.
Rayonun Zahid Əliyev küçəsində yerləşən 2 mərtəbəli yaşayış binası artıq uzun illərdir ki, qəzalı vəziyyətdədir.
1890-cı ildə Nobel qardaşlarının anbarı kimi inşa olunan bina sonradan yaşayış üçün həmin anbarda işləyən şəxslərə verilib. Bir əsrdən çox yaşı olan binanın sakinləri burada qorxu içində yaşayırlar. Onların sözlərinə görə, bir balaca külək əsən kimi bina da küləklə birlikdə əsir.
Pilləkənlərin kənarına dəmir parçası quraşdırılsa da, qəzalı vəziyyətin qarşısı alınmayıb. 2-ci mərtəbədə pilləkənlərin açıq dəhlizlərinə preslənmiş qaba yonqarlardan hazırlanan materialdan üzlük vurulsa da, problem bununla həllini tapmayıb. İstismar müddətini bitirmiş taxta konstruksiya üzərinə bərkidilən üzlüklər yağış sularından islandığından, qısa müddətdə onlar da sıradan çıxıb.
Sadalanan problemlərdən əlavə, yaxınlıqda tullantı sularının axıdıldığı göl və zibillikdən ətrafa yayılan qoxu yayda daha da dözülməz olur. Burada olan antisanitariya əlindən nəfəs almaq olmur.
Sakinlərin problemi ilə əlaqədar Suraxanı RİH-in Təsərrüfat şöbəsinin müdiri Mehman Hüseynov bildirdi ki, vətəndaşların köçürülməsi üçün qurum tərəfindən mərkəzi icra orqanlarına müraciət edilib.
“Hər hansı bir qərar qəbul olunarsa, vətəndaşların həmin binadan köçürülməsi işləri tərəfimizdən görüləcək və bina söküləcək”.
Suraxanı rayonu, Əmircan bələdiyyəsi isə binanın arxa tərəfinə atılan tullantılar barədə qeyd edib ki, bunula bağlı tədbir görüləcək və tullantılar ərazidən götürüləcək.
