Dörd gün əvvəl Bakının Nəsimi rayonunda 8 yaşlı məktəblinin intiharı ilə bağlı araşdırma davam etdirilir. Bu haqda bu gün, 30 aprel tarixində Kriminalqafqaz məlumat verib.
Hüquq-mühafizə orqanlarından verilən məlumata görə, müstəntiqlər intihar edən İran İslam Respublikasının vətəndaşı N.R.-in “Galaxy TAB A7” planşetində onu bu addımı atmağa vadar edə biləcək faktlar aşkar ediblər.
Belə ki, hadisədən dərhal sonra mənzilin oyun otağında müstəntiqlər maddi sübut kimi uşağın planşetini götürüblər. Mobil cihazın qalereya bölməsində insanları zorakılığa sövq edən qorxulu animasiyalar və şəkillərlə yanaşı, “Ölüm üçün 3 gün” (“3 days to die”) şəkilləri və digər oyun və mobil tətbiqləri aşkar edilib. Həmçinin planşetin “Samsung Notes” bölməsində “Salam, mən anabellayam və səni bu gecə öldürəcəyəm” mesajı tapılıb.
Bütün faktlar toplanılıb və Cinayət Məcəlləsinin “Özünü öldürmə həddinə çatdırma” maddəsi ilə cinayət işi başlanıb.
Faktla bağlı araşdırmalar davam etdirilir.
Daha öncə məlum olub ki, N.Şahbazov küçəsində yerləşən mənzildə İran İslam Respublikasının vətəndaşı, 8 yaşlı N.R. özünü turnikdən asıb. Anası uşağı xəstəxanaya çatdırıb, lakin onun həyatını xilas etmək mümkün olmayıb.
İlkin araşdırmalara görə, məktəblinin sinif yoldaşı ilə problemləri olub.
Uşağın anası bildirib ki, hadisədən əvvəl oğlu sinif yoldaşından incidiyi barədə şikayət edib. Bundan sonra uşaq mənzildəki oyun otağına gedib. Bir müddət sonra otağa daxil olan anası oğlunun özünü asdığını görüb.
