Bakıda avtomobil ustası olan paytaxt sakini “ZAZ” markalı avtomobillərdən ibarət kolleksiya yaradıb. Bu haqda BakuPlus.az Xəzər Televiziyasının hazırladığı reportaja istinadən bu gün, 19 aprel tarixində xəbər verir.
Avtomobil ustası Azər Əhmədov “ZAZ” markalı avtomobilləri yığaraq onlardan kolleksiya yaradıb. Kolleksiyadan əlavə o, həmin avtomobillərin satışı və təmiri işi ilə də məşğul olur. Hazırda onun qarajında 50-dən çox belə avtomobil var. Ustanın sözlərinə əsasən, indiyə qədər 100-dən çox “Zaporojets” əldə edib.
Əksəriyyətinin işlək olduğu həmin avtomobillərdən ən qədimi 1962-ci ilə məxsusdur.
Azər Əhmədovun sözlərinə əsasən, bir avtomobili yararlı vəziyyətə gətirmək 3-4 ay vaxt alır. Buna səbəb isə avtomobilin ehtiyat hissələrinin az olması və çətin tapılmasıdır.
Kolleksiyaçının ən sevdiyi “ZAZ 966 A” modelidir. Bu model üçün dəfələrlə iri məbləğdə pul təklif edilsə də, satmayıb.
Ustanın emalatxanasında ötən əsrin 50-ci illərində istehsal olunmuş digər markalı avtomobillər də var.
