Bakıda daha bir ağacların kəsilməsi faktı qeydə alınıb. Suraxanı rayonunun Qaraçuxur kəndində, Neftçilər parkında ağaclar kütləvi şəkildə məhv edilir. Bu haqda bu gün, 11 aprel tarixində BizimMedia məlumat verib.
Paytaxt sakinlərinin redaksiyaya göndərdiyi videomateriallarda parkda aidiyyəti qurumların əməkdaşlarının ağacları kəsdikləri lentə alınıb. İlkin ehtimallara görə, ağacların kəsilməsinə səbəb ərazidə yeni obyektin tikilməsidir.
Suraxanı rayon İcra Hakimiyyətindən bildiriblər ki, parkda quruyan ağaclar kəsilir, və həmin yerdə yeni ağaclar əkiləcək. Nümayəndə orada yeni obyektin tikilməsi ilə bağlı yayılan məlumatları da təkzib edib.
Qaraçuxur qəsəbəsində yerləşən istirahət parkı 1982-ci ildə salınıb. 6 hektarlıq ərazinin 4 hektar sahəsində mədəniyyət və istirahət parkı var. Ərazidə bir neçə iaşə obyekti və restoran yerləşir, daha 2 hektar sahədə isə meşə zolağı var.
