1000-nə yaxın ailənin yaşadığı Qaradağ rayonu, Şonqar qəsəbəsində uzun müddətdir ki, məktəb problemi yaşanır. Bu haqda 16 may tarixində Bakuplus.az Xəzərxəbər-ə istinadən məlumat verir.
Qəsəbədə təhsil ocağı olmadığına görə, şagirdlər Qızıldaş qəsəbəsində yerləşən məktəbə getmək məcburiyyətində qalır. Sakinlər deyirlər ki, yaşadıqları ərazidə məktəbin olmaması onlara ciddi çətinliklər yaradır.
“Hər gün Şonqar qəsəbəsindən 3000-nə yaxın şagird Qızıldaş qəsəbəsindəki məktəbə getməyə məcburdur. Qadınlar bilmir ki, ev işi ilə məşğul olsunlar, yoxsa uşağı məktəbə aparsınlar. Yaşlı, xəstə adamlar uşaqlarını məktəbə aparıb orada gözləməli olurlar”, - sakinlərdən biri bildirib.
Əvvəl qəsəbədə məktəb olub, lakin sonradan bilinməyən səbəblərə görə təhsil ocağı fəaliyyətini dayandırıb və baxımsızlıqdan yararsız vəziyyətə düşüb .
Məsələ ilə bağlı Bakı Şəhər Təhsil İdarəsindən bildirildi ki, Qaradağ rayonunun Şonqar yaşayış massivi Qızıldaş qəsəbəsindəki 180 nömrəli tam orta məktəbdən təxminən 2 kilometrlik məsafədə yerləşir. Şonqar yaşayış massivində 2004-cü ilə qədər 2 ibtidai sinif fəaliyyət göstərib. Sonradan həmin siniflərdə şagird sayının azlığı səbəbindən 180 nömrəli məktəbə köçürülüb.
İdarədən bildirilib ki, Şonqar qəsəbəsində məktəb tikintisi ilə bağlı əsaslı ehtiyac yaranarsa, məsələyə müvafiq qaydada baxıla bilər.
