Sulutəpə qəsəbəsi, Ruslan Allahverdiyev küçəsində yaşayan sakinlər məhəllə yollarında asfalt olmadığından, yolu “kubik” daşlarla döşəyiblər. Bu haqda bu gün, 5 may tarixində APA reportaj hazırlayıb.
Sakinlər bildirir ki, dəfələrlə aidiyyəti qurumlara şikayət etsələr də, bir tədbir görülməyib. Nəticədə, qonşular pul yığıb, yolu öz hesabına döşəyiblər.
Sakinlərin sözlərinə görə, yollar bu vəziyyətdə olduğundan, taksilər də gəlməkdən imtina edir.
Məsələ ilə bağlı Binəqədi rayon İcra Hakimiyyətindən bildirilib ki, problemdən xəbərdardırlar, bir müddət əvvəl Azərbaycan Avtomobil Yolları Dövlət Agentliyinə (AAYDA) müvafiq müraciət olunub.
AAYDA-nın mətbuat xidmətinin rəhbəri Anar Nəcəfli öz növbəsində bildirib ki, onlar da sözügedən ərazidəki vəziyyətdən xəbərdardırlar. Nəcəfli həmçinin qeyd edib ki, yaxın vaxtlarda əraziyə baxış keçiriləcək və təmir-bərpa işləri aparılacaq.
