Paytaxtın Suraxanı rayonu, Atamoğlan Rzayev küçəsində sakinlər yol infrastrukturunun olmamasından şikayətçidirlər. Bu haqda bu gün, 31 yanvar tarixində Bakuplus.az Real TV-yə istinadən xəbər verir.
Belə ki, adıçəkilən küçənin birinci problemi piyada keçidi, digəri isə avtomobillərin yüksək sürətidir. Avtomobillər burada yüksək sürətlə hərəkət edirlər, piyada zolağına isə məhəl qoyan yoxdur. Nişanlanma olsa da, zolaqlar silindiyindən sürücülər piyadalara yol vermirlər.
Sakinlərin sözlərinə görə, burada tez-tez qəzalar olur. Avtomobil gah dirəyə çarpılır, gah da evlərə. Onlar uşaqları yola buraxmağa qorxurlar, rəsmi qurumlar isə müdaxilə etmir.
Daxili İşlər Nazirliyindən bildirdilər ki, məsələ ilə bağlı müvafiq qurumlara artıq müraciət ünvanlanıb. Ərazidə yol infrastrukturunun yaxşılaşdırılması nəzərdə tutulub.
