Suraxanı rayon sakinləri baxımsız yaşayış binasından gileylənirlər. Bu haqda 19 aprel tarixində Bakuplus.az Realtv-yə istinadən məlumat verir.
Yeni Günəşli qəsəbəsi, AB yaşayış sahəsi 149 ünvanında illər öncə binanın arxa tərəfində sakinlərin arzusu ilə asudə vaxtının səmərəli keçirilməsi üçün kiçik park salınıb, ağaclar əkilib, söhbətgahlar qoyulub. Amma bu ağacların ömrü uzun olmayıb. Sakinlər deyir ki, mənzil istismar idarəsinin ərazidə apardığı dırnaq arası təmizlik işləri ağacların quruyaraq məhv olması ilə nəticələnib.
Bina sakinlərinin narahatlığına səbəb olan problemlərdən biri də həyətin işıqlandırılması ilə bağlıdır. İşıqlandırma olmadığından, axşam vaxtı işdən evə qayıdan sakinlər rahat hərəkət edə bilmirlər. Həmçinin binanın lifti nasaz vəziyyətdədir.
Suraxanı Rayon Mənzil Kommunal Təsərrüfat Birliyi bildirir ki, sakinlərin problemləri aidiyyəti idarələrə yönləndirilib və tədbir görülməsi üçün səy göstərilir. Ərazinin təmizliyinə isə daima nəzarət olunur.
Həmçinin, liftin təmiri ilə bağlı “Baklift-2” İxtisaslaşdırılmış İstehsalat İdarəsindən bildirirlər ki, sözügedən binanın liftində yaranan problemlər gün ərzində aradan qaldırılacaq.
Binanın həyətinin işıqlandırılmasına gəlincə, Suraxanı rayon Küçə İşıqları-Texniki İstismar İdarəsindən bildirildi ki, sözügedən problem araşdırılacaq və müvafiq tədbirlər görüləcək.
[caption id="attachment_41208" align="alignnone" width="800"] Foto Real TV-nin rəsmi Youtube kanalı[/caption]
