Mədəniyyət Nazirliyinin təşəbbüsü ilə martın 27-də teatrlarda Beynəlxalq Teatr Günü münasibətilə “Açıq qapı” günü elan edilib. Lakin sosial şəbəkələrdə bir sıra teatrlarda, o cümlədən Azərbaycan Dövlət Akademik Milli Dram Teatrında tamaşaçıların oturacaqlardan çox olması ilə bağlı məlumatlar yayılıb. Baş vermiş məsələ ilə bağlı teatrın mətbuat xidməti açıqlama verib. Bu haqda bu gün, 28 mart tarixində APA məlumat yayıb.
27 mart “Açıq qapı” günü ilə əlaqədar Akademik Milli Dram Teatrına təxminən 800 nəfər üz tutub.
Teatrdan dəqiqləşdiriblər ki, iticket.az saytı teatr biletlərinin satışına cavabdehdir: "Teatrın aylıq repertuarı bilet satışı üçün iticket.az saytına və teatrın kassasına həvalə olunur. Əlbəttə, sevindirici hadisədir ki, insanlar teatra bu qədər maraq göstərirlər. Amma nəzərə almaq lazımdır ki, zal 500 nəfərdən bir qədər artıq tamaşaçı tutumuna malikdir. Həmin gün çox az sayda dəvətnaməli tamaşaçı var idi. Zalın yer tutumunun heç 10 faizi deyildi. 500 nəfərdən çox tamaşaçının qarşılanması zamanı hər hansı narahatlığın olması mümkündür, bütün teatrlarda rast gəlinən haldır".
“Açıq qapı” layihəsi Akademik Milli Dram, Akademik Opera və Balet, Akademik Musiqili, Akademik Rus Dram, Kukla və Şuşa Dövlət Musiqili Dram Teatrlarını əhatə etmişdir. Teatrların ziyərətçiləri cədvəldə göstərilən tamaşaları izləyə biliblər. Teatrlara giriş sərbəst olmuşdur.
