Bakıda kuryerlər “Wolt” şirkətindən narazıdırlar. Bu haqda 22 aprel tarixində Oxu.az məlumat verib.
“Wolt” şirkətində kuryer işləyən 100-dən çox işçi bu gün işə çıxmayıb. Məlum olub ki, onlar maaş artımı tələbi ilə şirkətin mobil proqramını “offline” rejiminə salıblar.
Kuryerlər bildirirlər ki, nəqliyyat vasitələrini şirkət təmin etmir, özləri alır. Onların mütəmadi baxış xərcləri, eləcə də qəza zamanı, cərimə xərcləri və müştərilərlə əlaqə saxlamaq üçün xərclədikləri vəsaitləri öz ciblərindən odəyirlər. Həmçinin vergi hesabatı, DSMF, Tibbi Sığorta və qida xərclərini öz pulları ilə qarşılayırlar.
İşçilərin iddialarına görə, “Wolt” şirkəti artıq kuryerlərin bir çoxunu işdən çıxarıb. Tətil təşkilatçılarının sözlərinə görə, maaş artımı tələb edəndə, şirkətdən onlara hədə-qorxu gəlirlər ki, işləmək istəyən, növbədə gözləyən yüzlərlə insan var.
“Səni psixoloji olaraq sındıraraq inandırırlar ki, sənin əhəmiyyətin yoxdur, sən sadəcə statistikasan, yüzlərlə kuryerdən birisən. Səndən növbədə yüzlərlədir”, - deyə çağırışda bildirilir.
17:38 - Yenilənmə
“Wolt” şirkəti məsələyə cavab olaraq bildirib ki, kuryerlərin etirazına görə əməkdaşlığın dayandırılması və kuryerlərə hədə-qorxu gəlməsi barədə məlumat həqiqəti əks etdirmir. “Biz, bütün partnyorlarımıza hörmətlə yanaşırıq və biznesimizin necə idarə olunması haqda fikirlərimizin üst-üstə gəlməməsi səbəbindən heç vaxt partnyorluğumuzu bitirməzdik.
Dünən bir qrup kuryer ödəniş modelimizə edilən bəzi dəyişikliklərlə bağlı narazılığını bildirmək üçün sistemdə oflayn olmaq qərarını verdi. Kuryer-partnyorlarımıza təqdim olunan ödənişlər bazar səviyyəsinə uyğun olaraq qalır. Məsələn, hazırda Ramazan ayı ilə əlaqədar gün ərzində sifariş sayı bir qədər aşağıdır. Bu səbəbdən qazancların nisbətən aşağı düşməsi də gözləniləndir. Tələbatın aşağı enməsi həm bizə, həm də kuryer-partnyorlara öz təsirini göstərir və biz kuryerlərin narazılığını çox gözəl başa düşürük”, – şirkətdən bildiriblər.
Həmnçinin, şirkət rəsmisi əlavə edib ki, kuryerlərin bəziləri ilə görüşüb və etiraz edən kuryerlərdən heç biri ilə əməkdaşlığı dayandırmayıb.
