Gürcüstanın Batumi şəhərində keçirilən komandalararası Avropa çempionatının altıncı turunda Azərbaycanın kişi və qadınlardan ibarət şahmat yığmaları Ermənistan komandalarını məğlub ediblər.
İdman.biz xəbər verir ki, Azərbaycanın kişilərdən ibarət komandasının Ermənistan üzərində 2,5:1,5 hesablı qələbəsindən sonra Azərbaycan qadın komandası Ermənistanın müvafiq komandasını 3:1 hesabı ilə məğlub edib.
Qadınlardan ibarət komanda üçün Ülviyyə Fətəliyeva və Gülnar Məmmədova müvafiq olaraq Lilit Mkrtçyan və Mariya Gevorkyanı məğlub edərək qələbəni təmin ediblər. Xanım Balacayeva və Gövhər Beydullayevanın qarşılaşmaları heç-heçə başa çatıb.
Xatırladaq ki, Azərbaycanın kişilərdən ibarət yığma komandasında yeganə qalib gələn Şəhriyar Məmmədyarov olub. O, ağ fiqurlarla Şant Sarqsyana qalib gəlib. Digər qarşılaşmalar heç-heçə qurtarıb.
