Cəbrayıl sakinlərinə qarşı dələduzluq edən şəxslərin məhkəməsi başlayır. Bu haqda 12 may tarixində Report məlumat verib.
Bakı şəhər sakini Sədaqət Əzizova özünü Səhiyyə Nazirliyinin vəzifəli şəxsi kimi təqdim edərək qabaqcadan əlbir olduğu Aybəniz İbişova, Elçin Abışov və Vasif Abışov ilə birlikdə bir neçə Cəbrayıl rayon sakininin hazırda dayandırılmış sosial müavinətlərini yenidən bərpa etdirəcəyinə dair yalan vəd verərək onlardan ümumilikdə 5851 manat pul mənimsəyib.
Hər dörd şəxs barəsində Cinayət Məcəlləsinin “Qabaqcadan əlbir olan bir qrup şəxs tərəfindən dələduzluq”, “Təkrar dələduzluq”, “Vəzifəli şəxsin səlahiyyətlərini mənimsəmə” və “Rüşvət verməyə təhrik etmə” maddələri ilə ittiham olunub. Cinayət işi baxılması üçün aidiyyəti üzrə Lənkəran Ağır Cinayətlər Məhkəməsinə göndərilib.
