Bakıda ayıq sürücü şirkətinin direktorunun 32.000 manat pulunu mənimsəyiblər. Bu haqda bu gün, 24 may tarixində Bakuplus.az Oxu.az-a istinadən xəbər verir.
25 yaşlı Elnur Qədimov əvvəllər işlədiyi “Alco Drive” ayıq sürücü şirkətinin direktoru Seymur Məmmədova dərman satışı biznesinə investisiya etməyi təklif edib. Daha sonra aldadıldığını başa düşən S.Məmmədov pulu geri tələb etsə də, qarşı tərəf vəsaiti şəxsi ehtiyacları üçün xərclədiyini bildirib.
“O, görüşə baha avtomobillərlə gəlirdi. Ona görə də yaxşı gəliri olduğunu düşündüm”, - deyə zərərçəkən qeyd edib.
Bütün nəqliyyat vasitələrinin “Rent a car”-dan olduğu məlum olub.
Elnur Qədimova 2 il müddətinə azadlığın məhdudlaşdırılması cəzası verilib və elektron nəzarət cihazı tətbiq edilib.
