Bakıda xaricdən gətirilən avtomobil qarət edilib. Bu haqda bu gün, 12 may tarixində Bakuplus.az Xəzər Xəbər-ə istinadən məlumat verir.
Paytaxt sakini Azər Rəcəbov ABŞ-dan 13.000 manata avtomobil alıb. Nəqliyyat vasitəsini qeydiyyatdan keçirəndən sonra Gömrük Komitəsinin önündəki dayanacaqda saxlayıb. Bir neçə gündən sonra isə avtomobili qoyduğu yerdə tapmayıb.
“Getdim avtomobilimi götürməyə, gördüm ki, yerində yoxdur. Düşündüm ki, avtomobili cərimə meydançasına aparıblar. Ərazidə olan DYP əməkdaşına müraciət etdim. O isə dedi ki, bir qədər aralıda filan markalı filan rəngdə avtomobili yolun kənarına tullayıblar”.
Zərərçəkənin sözlərinə görə, polis əməkdaşları tədbir səbəbindən avtomobili dayanacaqdan götürərək, yolun kənarına atıblar. Bundan istifadə edən dələduzlar nəqliyyat vasitəsinin müxtəlif hissələrini oğurlayıblar.
“Hər şeyi aparıblar, apara bilmədiklərini zədələyiblər”, - deyə avtomobilin sahibi əlavə edib.
Daxili İşlər Nazirliyindən məsələ ilə bağlı araşdırma aparılacağını bildiriblər.
