Bakıda qaynını azyaşlı oğlunun gözü qarşısında xüsusi amansızlıqla qətlə yetirməkdə təqsirləndirilən Həsən Həsrətovun kassasiya şikayəti üzrə məhkəmə iclasının vaxtı məlum olub.
Ali Məhkəmədə proses sentyabrın 24-də hakim İlkin Rəcəbovun sədrliyi ilə keçiriləcək.
İttihama görə, hadisə 2023-cü ildə Nizami rayonunda baş verib. Həsən Həsrətov əvvəlcə qaynı Rasim Zamanovun oğlunu şillə ilə vurub. Bundan sonra Rasim oğlunu müdafiə etmək üçün hadisə yerinə gəlib. Tərəflər arasında mübahisə zamanı Həsən əvvəlcədən özü ilə gətirdiyi bıçaqla Rasimə çoxsaylı zərbələr endirib.
Rasim Zamanov aldığı ağır bıçaq yaraları, o cümlədən sağ ağciyərinin zədələnməsi nəticəsində qanaxmadan ölüb. İttihama görə, qətl onun azyaşlı oğlunun gözü qarşısında törədilib.
Bakı Ağır Cinayətlər Məhkəməsi Həsən Həsrətovu 18 il müddətinə azadlıqdan məhrum edib. Apellyasiya Məhkəməsi cəzanı 16 ilədək azaldıb. Dövlət ittihamçısının kassasiya protesti isə Ali Məhkəmə tərəfindən təmin edilməyib.
Mənbə pravda.az
