Sərnişinlər 113 nömrəli marşrut xətti ilə hərəkət edən avtobuslardan şikayətçidir.
Bakuplus.az-ın məlumatına görə, Əmircan qəsəbəsindən "Qara Qarayev" metro stansiyası istiqamətində fəaliyyət göstərən nəqliyyat vasitələri acınacaqlı vəziyyətdədir.
Sakinlərin sözlərinə görə, marşrut xəttində sınıq-salxaq oturacaqlı və natəmiz nəqliyyat vasitələri istifadə olunur.
Bildirilir ki, sözügedən marşrut Əmircanın bu hissəsində yaşayan sakinlər üçün yeganə nəqliyyat vasitəsidir və gün ərzində avtobuslar arasında interval çox olduğuna görə onlara minmək çətinləşir. Bundan əlavə, avtobus yolunun bərbad olması vəziyyəti daha da ağırlaşdırır.
"Yol bərbad, avtobuslar köhnə, aidiyyəti qurumlar isə məsələni görməzdən gəlir. Sanki bu avtobuslarla mal-qara daşıyırlar" , - deyə sakinlər bildirib.
