Sabunçu Rayon Məhkəməsində qəsdən sağlamlığa yüngül zərər vurmada təqsirləndirilən Xəlil Bayramovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, ittihama görə, hadisə Bakı şəhəri, Sabunçu rayonu, Sabunçu qəsəbəsində qeydə alınıb.
Belə ki, təqsirləndirilən şəxs qeyri-rəsmi münasibətdə olduğu zərərçəkmiş İlahə Bədəlovanın (adı, soyadı şərtidir) onunla münasibətə son qoymaq istəməsini bəhanə edərək, taksinin salonunda aralarında yaranmış mübahisə zamanı qadına qarşı fiziki zor tətbiq edib. O, İlahənin çənəsinin altından və boğazından tutaraq, həmçinin sifət və baş nahiyələrinə qəsdən zərbələr endirərək ona bədən xəsarətləri yetirib.
Hadisədən sonra Xəlil Bayramov saxlanılaraq cinayət məsuliyyətinə cəlb edilib.
Hakim Elnurə Rəcəbovanın sədrliyi ilə keçirilən prosesdə hökm oxunub.
Məhkəmənin hökmü ilə ona 8 ay 10 gün müddətə azadlığın məhdudlaşdırılması (elektron qolbaq) cəzası təyin edilib.
