Bakının Sabunçu rayonunda taksi sürücüsü sərnişin qadınla mübahisə edərək onu avtomobildən zorla düşürüb və döyüb.
İstintaq materiallarına görə, hadisə əlavə 5 manat ödəniş üstündə yaranan mübahisə zamanı baş verib. Sürücü qadından onu Xətai rayonuna aparmaq üçün əlavə ödəniş tələb edib. Qadın isə sifariş zamanı göstərilən məbləği ödədiyini bildirərək əlavə pul verməkdən imtina edib.
Tərəflər arasında mübahisə zamanı qadının sürücüyə "həyasız sənin anandır" deməsi vəziyyəti daha da gərginləşdirib. Bundan sonra sürücü avtomobildən düşərək qadını zorla maşından çıxarıb, ona yumruqla zərbələr endirib. Qadının sözlərinə görə, sürücü hətta dəmir alətlə də ona xəsarət yetirib.
Hadisə ilə bağlı sürücü Cinayət Məcəlləsinin müvafiq maddəsi ilə təqsirləndirilib. O, ifadəsində əməlindən peşman olduğunu və zərərçəkmişlə barışdığını bildirib.
Qadın isə hadisədən sonra psixoloji yardım almağa başladığını deyib. Onun sözlərinə görə, sürücü ona 3500 manat ödəyib və o, şikayətindən imtina edərək təqsirləndirilən şəxsi bağışlayıb.
Sabunçu Rayon Məhkəməsinin hökmü ilə sürücü cinayət məsuliyyətindən azad edilib və cinayət işinin icraatına xitam verilib.
mənbə: demokrat.аz
