Azərbaycanda sürücülük vəsiqəsi alan qadınların sayı son 17 ildə 10 dəfədən çox artıb. Belə ki, 2025-ci ildə vəsiqə alan hər 5 nəfərdən təxminən biri qadın olub.
Bakuplus.az xəbər verir ki, Dövlət Statistika Komitəsinin "Azərbaycanda qadınlar və kişilər – 2026" statistik məcmuəsinə əsasən, ötən il Azərbaycanda 350 min 175 nəfər sürücülük vəsiqəsi alıb. Onların 65 min 696-sı qadın, 284 min 479-u isə kişi olub. Qadınların ümumi göstəricidə payı 18,8 faiz təşkil edib.
2024-cü ildə sürücülük vəsiqəsi alan 360 min 346 nəfərin 57 min 153-ü qadın olub. Beləliklə, bir il ərzində qadın sürücülük vəsiqəsi alanların sayı 8 min 543 nəfər və ya 14,9 faiz artıb. Kişilərin sayı isə 6,2 faiz azalıb.
Müqayisə üçün, 2021-ci ildə sürücülük vəsiqəsi alanların 10,5 faizi, 2022-ci ildə 11,8 faizi, 2023-cü ildə isə 12 faizi qadın olub. 2025-ci ildə bu göstərici 18,8 faizə yüksəlib.
Uzunmüddətli statistikaya görə, 2008-ci ildə cəmi 6 min 187 qadın sürücülük vəsiqəsi alıb. Həmin vaxt qadınların ümumi göstəricidə payı 4,6 faiz olub. 2025-ci ildə isə onların sayı 65 min 696 nəfərə çatıb.
Bununla belə, sürücülük vəsiqəsi alanlar arasında kişilər üstünlük təşkil edir. 2025-ci ildə kişilərlə qadınlar arasındakı say fərqi 218 min 783 nəfər olub. Qeyd edək ki, bu rəqəmlər ümumilikdə avtomobil idarə edən şəxslərin deyil, müvafiq illərdə sürücülük vəsiqəsi alanların sayını əks etdirir.
