Bakının Yasamal rayonunda şəxsi münasibətlər zəminində yaranan mübahisə xəsarətlə nəticələnib.
Demokrat.az xəbər verir ki, 1999-cu il təvəllüdlü Cahangir tanışı İlqarla aralarında olan fikir ayrılığına görə onu döyüb. Hadisə D.Bünyatzadə küçəsində yerləşən "Yeklər" kafesinin yaxınlığında baş verib.
İstintaq materiallarına əsasən, Cahangir İlqara ciddi münasibətdə olduğu Səma adlı qızla bağlı suallar verib. Belə ki, o, İlqara Səma ilə fikrinin ciddi olub-olmadığını soruşub. İlqarın isə bu suala kobud cavab verməsi tərəflər arasında gərginlik yaradıb. Kafedə başlayan mübahisə sonradan küçədə davam edib. Cahangir əsəbiləşərək tanışının üz nahiyəsinə əl zərbəsi endirib.
Hadisədən sonra Cahangirin barəsində Cinayət Məcəlləsinin 128-ci maddəsi – "qəsdən sağlamlığa zərər vurma" – ilə ittiham irəli sürülüb. O, istintaq və məhkəmə zamanı özünü təqsirli bilib, hadisəni əsəbi halda törətdiyini bildirib.
Yasamal Rayon Məhkəməsində məlum olub ki, tərəflər sonradan barışıblar və zərərçəkmiş İlqar ona qarşı şikayətini geri götürüb. Bu səbəbdən məhkəmə Cahangiri Cinayət Məcəlləsinin 73.2-ci maddəsinə əsasən cinayət məsuliyyətindən azad edib və barəsindəki təqibə xitam verib.
