Bakının Sabunçu rayonunda 50 yaşlı kişi həyat yoldaşına xəsarət yetirib.
Demokrat.az-ın əldə etdiyi məlumata görə, hadisə ötən ilin oktyabrın 23-də baş verib. Bakı şəhər sakini, 1976-cı il təvəllüdlü İlkin həmin gün saat 18 radələrində yaşadıqları evin qarşısında həyat yoldaşı Nərminə ilə mübahisə edib. Xanım spirtli içki qəbul edən ərinə irad tutub. Bu zaman İlkin əlində olan çəkiclə Nərminəyə xəsarətlər yetirib.
Hadisəni törədən İlkinin barəsində Cinayət Məcəlləsinin qəsdən sağlamlığa zərər vurma maddəsi ilə ittiham elan edilib.
Məhkəmə iclasında zərərçəkmiş şəxs yazılı ərizə təqdim edib və cinayət qanunu ilə nəzərdə tutulmuş əməli törətmiş şəxs ilə barışdığını, ona dəymiş ziyanın tam ödənildiyini, ərindən şikayəti olmadığını bildirib.
Nizami Rayon Məhkəməsinin hökmü ilə Cinayət Məcəlləsinin müvafiq maddəsinə əsasən, təqsirləndirilən şəxsin barəsində olan cinayət işinə xitam verilib. O, cinayət məsuliyyətindən azad edilib.
