Xəbər verdiyimiz kimi, Bakının Xətai rayonu, Əhmədli qəsəbəsi ərazisində torpaq sürüşməsi olub. Məlumata görə, hadisənin səbəbi texnogen problemlərlə bağlı olub. Bəs Bakının başqa hansı ərazilərində torpaq sürüşməsi riski var?
Elm və Təhsil Nazirliyinin Akademik Həsən Əliyev adına Coğrafiya İnstitutunun şöbə müdiri, ekoloq Ənvər Əliyev metbuat.az-a açıqlamasında bildirib ki, harada su keçirməyən süxurlar varsa, onların üstündə istər təbii yolla, istərsə də süni şəkildə torpaq qatı toplanır. Yəni sonradan əmələ gəlmiş torpaq sahələri yaranır və həmin ərazilərdə sürüşmə halları müşahidə olunur.
Onun sözlərinə görə, Bakıda belə yerlər kifayət qədər çoxdur.
Elmlər Akademiyasının fəxri doktoru, professor, memar Cahid Həsənov isə söyləyib ki, Bakının sürüşmə riski ən yüksək olan ərazisi, birmənalı şəkildə, Bayıl zonasıdır:
"Relyefin xüsusiyyəti və bu ərazidə çoxmərtəbəli binaların inşa olunması sürüşmə təhlükəsini daha da artırır. Rəsmi mənbələrin məlumatına görə, Bayıl ərazisində müəyyən bərkidici işlər aparılır. Bununla belə, ayrı-ayrı yerlərdə, xüsusilə çayqırağı və dənizkənarı sahələrdə sürüşmə hallarının müşahidə olunması təbii sayılır. Suyun səviyyəsindəki dəyişikliklər, iqlim amilləri və torpaq qatının xüsusiyyətləri bu prosesi gücləndirən səbəblərdəndir".
Memar qeyd edib ki, sürüşmə zolaqları, əsasən, enişli-yoxuşlu ərazilərdə formalaşır. Belə yerlərdə tikinti aparmaq yüksək risk daşıyır:
"Hətta texniki tələblərə tam əməl olunsa belə, bu cür ərazilərdə tikilinin ağırlığı torpaq qatına əlavə təzyiq göstərir və bu da sürüşmə ehtimalını artırır".
