Bəzi müəllimlərin qız uşaqlarına təhsildən uzaqlaşdıran və erkən nikaha təşviq edən fikirlər səsləndirdiyi bildirilir. Müəllim hazırlığında fənn biliyi ilə yanaşı, psixoloji və insani keyfiyyətlərin də nəzərə alınması təklif olunur.
Bunu Milli Məclisin Ailə, qadın və uşaq məsələləri komitəsinin sədri Hicran Hüseynova komitənin payız sessiyasındakı ilk iclasında bildirib.
Komitə sədri gələcəyin müəllimlərinin yetişdirildiyi universitetlərdə maarifləndirici görüşlərin keçirilməsinin vacibliyini vurğulayıb.
"Şəxsi təcrübəmdən və müxtəlif söhbətlərdən görürəm ki, bir çox hallarda müəllimlər uşaqlara psixoloji cəhətdən düzgün təsir göstərə bilmirlər. Ola bilər ki, müəllim öz fənnini çox yaxşı bilir. Lakin insani keyfiyyətlər baxımından qız uşağına deyir: "Niyə bu qədər əziyyət çəkib oxuyursan? Onsuz da tezliklə ərə getməlisən"", – Hicran Hüseynova deyib.
Onun sözlərinə görə, belə düşünən müəllimlər hələ dünyagörüşü tam formalaşmamış uşaqlara mənfi təsir göstərə bilirlər:
"Biz mütəxəssisin yaxşı kadr olmasına və fənnini mükəmməl bilməsinə diqqət yetiririk. Lakin onun bir insan, müəllim və psixoloq kimi auditoriyada uşaqlara müsbət təsir göstərib-göstərməyəcəyini əvvəlcədən müəyyən edə bilmirik. Problem də məhz buradan qaynaqlanır".
Komitə sədri dini icmalarla əməkdaşlığın da vacib olduğunu bildirib. O qeyd edib ki, qız və oğlan uşaqlarının eyni səviyyədə təhsil almasını dəstəkləyən, cəmiyyətə müsbət mesajlar verən din xadimləri var.
Mənbə: modern.аz
