"Mənim 69 yaşım var və 62 ildir ki, "Neftçi" azarkeşiyəm. Atam, anam, dayılarım – hamısı Bakı klubunun fanatı idi. Mən də onlara baxıb öyrənmişəm və azarkeş olmuşam. Bu günə qədər də komandamızı dəstəkləməyə davam edirəm. Ailəmdən gələn şeydir".
Bunu qafqazinfo.az-a müsahibəsində 69 yaşlı "Neftçi" azarkeşi, paytaxt klubunun futbolçusu Murad Məmmədovun nənəsi Əfiqə Məmmədova deyib.
Əfiqə Məmmədova "Neftçi"nin əfsanəvi futbolçusu Anatoli Banişevski ilə bağlı maraqlı bir xatirəsini də danışıb: "Banişevski bizim qonşumuzun dayısının uşaqları ilə yaxın idi. Onu iki illik futboldan uzaqlaşdırdıqları dönəmdə qonşumuza qonaq gəlmişdi. Həmin gün də "Neftçi" SSRİ çempionatında "Ararat"la oynayırdı. Onların televizoru xarab olduğu üçün bizim evdə gəlib oyuna baxdılar. Həmin vaxt Ermənistan təmsilçisi "Neftçi"yə 1:0 hesabı ilə qalib gəldi. Banişevski bizim evdən ağlaya-ağlaya çıxdı və bizi də ağlatdı. Həmin il "Neftçi" azarkeşləri stadionu dağıtmışdılar, oturacaqları və qapıları qırmışdılar. O ildə Səməd Qurbanov da futbola əlvida dedi. Açıqlama vermişdi ki, "biz ermənilərə bu cür uduzduqsa, mən daha futbol oynamaram".
