"Nizami rayonu, Naxçıvanski küçəsi 48 ünvanındakı binada iki həftədən çoxdur ki, lift işləmir. 9 mərtəbəli binanın sakinləri, xüsusən yaşlılar, uşaqlar, xəstələr pilləkənləri düşüb-çıxmaqda əziyyət çəkirlər".
Bu şikayətlə qafqazinfo.az-a həmin binanın 8-ci mərtəbəsində yaşayan Etimad Muradov müraciət edib.
Onun sözlərinə görə, dəfələrlə aidiyyəti quruma zəng olunsa da, problem öz həllini tapmır: "Lift İdarəsinə dəfələrlə zəng etmişik. Bir dəfə gəlib baxdılar, dedilər ki, platası yanıb. Bir müddət onun alınmasını gözlədik. Nəhayət, alındı, bu dəfə də düzəltməyə gələndə dedilər ki, liftin elektrik naqilində qısaqapanma olub. "Azərişıq"dan gəlib baxmalıdırlar. Anlamıram ki, qurumları biz əlaqələndirməliyikmi? Yarım aydır zülm çəkirik..."
Məsələ ilə bağlı "Lifttəmir" İstehsalat Birliyindən bildirilib ki, hazırda liftdəki nasazlığın aradan qaldırılması istiqamətində iş gedir: "Temp" Dövlət Müəssisəsi C.Naxçıvanski küçəsi 48 nömrəli binanın birinci blokunda lifti elektrik enerjisi ilə təmin edən kabel xəttində baş verən qısaqapanma nəticəsində lifti idarə edən ana plata və əyləc sisteminin platası yanaraq sıradan çıxıb. Hazırda mütəxəssislər tərəfindən yaranan nasazlığın aradan qaldırılması istiqamətində işlər görülür. Yaxın zamanlarda nasazlıq aradan qaldırılacaq və lift sazlanaraq sakinlərin istifadəsinə veriləcək".
İdarədən həmçinin qeyd edilib ki, görülən işlərə dair sakinlərə məlumatlar verilib və onlara gələcəkdə bu kimi halların baş verməməsi üçün liftdən istifadə qaydalarına düzgün əməl edilməsi tövsiyə olunub.
