Ötən gün gecə saatlarında paytaxtın Xətai rayonunda piyadanın xəsarət alması ilə nəticələnən yol-nəqliyyat hadisəsi baş verib.
Gəncə prospektində eynisəviyyəli piyada keçidinin yaxınlığında iki minik avtomobili toqquşub.
Belə ki, maşınlardan biri yolu keçidlə keçən şəxsə yol verərkən arxadan gələn digər nəqliyyat vasitəsi ona çırpılıb. Öndəki avtomobil idarəetmədən çıxaraq piyadanı vurub. Xoşbəxtlikdən piyada yüngül xəsarətlərlə qurtula bilib.
Hadisə yerindən çəkilmiş görüntülərdən məlum olur ki, qəzanın baş verdiyi gecə saatlarında Gəncə prospektinin işıqlandırılması dayandırılıb. Sakinlər prospektdə işıqlandırmanın olduğunu, lakin sutkanın müəyyən saatlarında söndürüldüyünü bildiriblər.
Xətai Rayon İcra Hakimiyyəti başçısı aparatının şöbə müdiri Pənah İmanov qafqazinfo.az-ın sorğusuna cavab olaraq bildirdi ki, məsələ ilə bağlı araşdırma aparılacaq və küçənin işıqlandırılması ilə bağlı məsələ nəzarətə götürüləcək.
