Aparıcı Aytən Səfərova uşaqların 4-cü sinifdə imtahandan kəsilməsindən şikayətlənib.
Axşam.az xəbər verir ki, bu barədə o, "Xəbər ertəsi" verilişində danışıb:
"Nə qədər yükləyərlər? Bilirsiniz, biz yavaş-yavaş hansı dövrə gedirik? Elə bil, bu böyük bir prosesdir ki, insanlar təhsildən uzaqlaşsınlar, savadsızlaşsınlar. Belə deyək, bu, ən pis ssenaridir. Sabah insanlar bezəcək, psixologiyası pozulmuş uşaqlar olacaq. Mənim övladım şikayət edir ki, günorta, axşam dərs... Uşaq evə ancaq yatmağa gəlir. Nəfəs almağa vaxt yoxdur, şənbə və bazar günləri də yükləyirlər. Sonra deyirik ki, uşaqlar bizim gələcəyimizdir. Getdikcə ancaq imkanlı şəxslər uşaqlarını oxuda biləcək, biz isə bir "Abbas"ın dalınca qaçacağıq".
Aparıcı Mehman Rəsulov isə fikirlərini belə ifadə edib:
"5-ci sinfə keçmək üçün uşaq niyə imtahan verir? Tutaq ki, kəsildi, nə olacaq? 4-də kəsildi, sinifdə qalacaq? Dördüncü sinifdə uşaq oxumursa, burada günahın nə qədəri onun özündədir? Şagirdi 5-ə keçirməmək, onu əvvəlki sinfə salmaq, həmin uşağı məsxərə obyektinə çevirməkdir. Bizim reallığımız budur. Sonra o uşağa göz verib işıq verməyəcəklər, itirdik biz o uşağı".
