Azərbaycan Silahlı Qüvvələrinin 19 sentyabr 2023-cü ildə Qarabağda keçirdiyi antiterror əməliyyatı zamanı şəhid olan kapitan Xəlfəli Sultanovun atası illər əvvəl oğlunun verdiyi borcu geri ala bilmək üçün məhkəməyə müraciət edib.
Teleqraf.az xəbər verir ki, şəhidin atası Böyükağa Sultanov bu məqsədlə mülki qaydada məhkəməyə iddia ərizəsi təqdim edib.
İddiada qeyd olunub ki, Xəlfəli Sultanov 2022-ci ildə xalası qızı Aytən Zeynalovaya 26 min manat məbləğində borc verib. Aytən Zeynalova bu vəsaiti Bakıda ətir mağazası açmaq üçün götürüb. Borcun qaytarılmadığını bildirən Böyükağa Sultanov qarşı tərəflə razılığa gələ bilmədiyi üçün məhkəməyə üz tutub.
Cavabdeh isə iddiada göstərilən məbləğlə razılaşmayıb.
Xətai Rayon Məhkəməsi şəhid atasının iddiasını qismən təmin edərək cavabdehin 15 min manat ödəməsi barədə qərar çıxarıb. Hər iki tərəf bu qərardan narazı qalıb və iş Bakı Apellyasiya Məhkəməsinə daşınıb.
Apellyasiya instansiyası cavabdehin şikayətini qismən təmin edərək ödəniləcək məbləği 12 min manat olaraq müəyyənləşdirib. Araşdırmalar zamanı 26 min manatlıq borcu təsdiqləyən sənədlər təqdim olunmadığı üçün məhkəmə bu məbləğin tam sübuta yetirilmədiyi qənaətinə gəlib.
Şahid ifadələrində Xəlfəli Sultanovun xalası qızına borc verdiyi təsdiqlənsə də, dəqiq məbləğ barədə konkret məlumatlar qeydə alınmayıb.
