Abşeron rayonunda kişi qeyri-rəsmi münasibətdə olduğu qadını gecə evə gec gəldiyinə görə döyüb.
Demokrat.az xəbər verir ki, 1987-ci il təvəllüdlü Tahir (adlar şərtidir – red.) 2024-cü ilin yanvarından Şamaxı rayon sakini Məhbubə ilə kirayə evdə yaşayırmış. Onların rəsmi nikahı olmasa da, ər-arvad münasibətində olublar.
Təqsirləndirilən şəxs ifadəsində bildirib ki, həyat yoldaşı Səidə ilə birgə nikahdan olan 3 azyaşlı övladları ilə yaşayıb. Amma eyni zamanda kirayə tutduğu mənzildə yaşayan Məhbubə ilə qeyri-rəsmi ər-arvad münasibətində olub. Həmin ünvana həftədə bir-iki dəfə gedib-gələrək, qadının maddi ehtiyaclarını qarşılayıb.
Hadisə aprelin 2-də gecə saatlarında baş verib. Tahir həmin vaxt qadının evə gec gəldiyinə görə onunla mübahisə edib. Daha sonra Məhbubənin "özüm bilərəm nə vaxt gələrəm" sözünə əsəbiləşən Tahir, onun üzərinə hücum edərək yumruqla çənəsinə, daha sonra saçından tutub yerə yıxaraq alın, qol və bədəninin müxtəlif hissələrinə təpiklə zərbələr endirib.
Zərərçəkmiş qadın hadisədən sonra DİN-in "102" qaynar xəttinə və Abşeron Rayon Polis İdarəsinə müraciət edib. Məhkəmədə həm Tahir, həm də Məhbubə ifadə verib. Tahir hadisəni etiraf edib və onu qısqanclıqla izah edib.
Abşeron Rayon Məhkəməsinin hökmü ilə Tahir Cinayət Məcəlləsinin 128-ci maddəsi (qəsdən sağlamlığa zərər vurma) ilə təqsirli bilinsə də, Cinayət Məcəlləsinin 73.2-ci maddəsinə əsasən cinayət məsuliyyətindən azad edilib və barəsindəki təqibə xitam verilib.
