Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Yusif Kərimovun (adı, soyadı şərtidir) cinayət işi üzrə məhkəmə istintaqı başa çatıb.
Pravda.az xəbər verir ki, hadisə 16 may 2025-ci il tarixə keçən gecə, saat 01:30 radələrində paytaxtın Yasamal rayonu ərazisində qeydə alınıb.
2008-ci il təvəllüdlü Yusif Kərimov yaşayış binasının həyətində tanışı, zərərçəkmiş İxtiyar Babayevlə (adı, soyadı şərtidir) aralarında yaranmış münaqişə zamanı qəsdən ona bıçaqla xəsarət yetirib.
Mübahisə 95 manat üstündə yaranıb, təqsirləndirilən şəxs zərərçəkmiş şəxsin borcu qaytarmadığını bildirərək bıçaqla İxtiyarın bədəninin müxtəlif nahiyələrinə ardıcıl iki bıçaq zərbəsi endirib.
Hadisədən sonra təqsirləndirilən şəxs barəsində yetkinlik yaşına çatmayanı nəzarət altına vermə qətimkan tədbiri seçilib.
Məhkəmədə isə hakim Vüqar Quliyevin sədrliyi ilə keçirilən prosesdə hökm oxunub. Təqsirləndirilən şəxsə şərti cəza verilib.
