Ölümə səbəb olan yol qəzasında təqsirləndirilən Elgün Kərimovun kassasiya şikayətinə baxış başa çatıb. Hakim İlqar Qılıcovun sədrliyi ilə keçirilən iclasda elan olunub ki, Kərimovun müdafiə tərəfi şikayəti geri götürüb. Bununla bağlı kassasiya şikayətinin geri qaytarılması barədə qərar qəbul edilib.
Pravda.az xəbər verir ki, ittihama görə, ötən ilin 29 sentyabrında Pirşağı qəsəbəsində 44 yaşlı Raqif Abbasov avtomobillə vurularaq ölüb.
Bildirilir ki, hadisəni törətməkdə təqsirləndirən Elgün Kərimov fərdi qaydada əmlak alqı-satqısı ilə ("makler" fəaliyyəti) məşğul olub. Sentyabrın 29-da onun ad günündə atası Elçinlə, eləcə də bir neçə digər "makler" dostları ilə Pirşağıdakı məşhur restoranlardan birinə gəliblər. Elgün hadisədən bir gün əvvəl "Range Rover Sport" markalı avtomobili icarə götürüb. Qəzanı da həmin avtomobil ilə törədib. Belə ki, onlar ad günü mərasimində yeyib-içiblər və Elgün gecə saatlarında avtomobil ilə 44 yaşlı Raqif Abbasovu vurub. Onun atası və digər şəxslər yaralını xəstəxanaya aparsa da, Elgün hadisə yerindən uzaqlaşıb. Yaralı şəxsin isə həyatını xilas etmək mümkün olmayıb.
Kərimov məhkəmədə zərərçəkmiş ailəyə 18 min manat ödəndiyini bildirib.
Bakı Ağır Cinayətlər Məhkəməsinin hökmü ilə o, 6 il müddətinə azadlıqdan məhrum edilib. Cəzasını çəkdikdən sonra 3 il 6 ay sürücülük hüququndan məhrum olacaq. Bakı Apellyasiya Məhkəməsi də əvvəlki hökmü qüvvədə saxlayıb.
