Bakıda ucuz dönərin hazırlanması araşdırılıb. Bu haqda 12 mart tarixində ATV məlumat verib.
Dönərin hazırlanmasında istifadə olunan məhsulların qiymətləri onun satış qiymətləri ilə uyğun gəlmir. Toyuq ətinin bir kiloqramının orta qiyməti 7, mal ətinin qiyməti isə 11-13 manat arasında dəyişir. Bu halda belə dönər 1 manata satılır. Satıcılar həm maya dəyəri çıxarır, həm də qazanc əldə edə bilirlər.
“Dönərdə hər şeyi az olur deyə 1 manatdır. Bizdə ancaq tələbələrin cibinə uyğundu ona görə. Tələbələri nəzərə alırıq. Əti özümüz istehsal edirik”,- dönərçi bildirib. İstehsal etdiyi ətin keyfiyyət sertifikatı istənilsə də o, heç bir sənəd göstərə bilməyib.
Qiyməti şübhə doğuran dönərin keyfiyyətinə əmin olub yeyənlər də var, ehtiyyat edib uzaq duranlar da.
Azad İstehlakçılar Birliyinin sədri Eyyub Hüseynov da deyir ki, 1 - 1.5 manata satılan dönərin keyfiyyətli olması mümkün deyil.
“Dönərxanalar təsadüfi ölmüş heyvanların, murdar olmuş, yeyilməyən heyvanların ətinin satıldığı bir şəbəkədir”, - Eyyub Hüseynov əlavə edib.
